Gërvalla: Prokuroria ishte e informuar për rrezikun ndaj Arlinda Zekajt që nga 10 korriku

Ministrja e Drejtësisë, Donika Gërvalla, ka bërë të ditur se Prokuroria ishte e informuar për dhunën dhe kërcënimet ndaj 49-vjeçares Arlinda Zekaj që nga 10 korriku. Reagimi i ministres vjen pas zhvillimeve të fundit dhe publikimit të dokumenteve që dëshmojnë trajtimin e rasteve të raportuara para vrasjes së ndodhur në Vitomiricë të Pejës.

Siç raportoi Zhurma më 1 nëntor 2026, Natyra Kuçi kishte publikuar letrën e 7 shtatorit 2026, ku e ndjera Arlinda Zekaj i lutej gjyqtarit Migjen Kastrati për mbrojtje dhe për kujdestarinë e djalit të saj.

Sipas Gërvallës, më 23 tetor, vetëm dy ditë para vrasjes, edhe kryeprokurorja ishte informuar me shkrim për një kërcënim të drejtpërdrejtë me vrasje që Arlinda Zekaj kishte raportuar nga Albert Sylaj. Ministrja e Drejtësisë ka theksuar se viktimës i kanosej rrezik serioz dhe se institucionet kishin pasur në dispozicion informacione të plota lidhur me kërcënimet ndaj saj. Ky reagim vjen pas publikimit të raportit të Ministrisë së Drejtësisë, të prezantuar më 30 tetor nga ministrja Gërvalla dhe ministri i Punëve të Brendshme, Xhelal Sveçla, lidhur me veprimet dhe mosveprimet e institucioneve në këtë rast. Sipas gjetjeve të paraqitura, pavarësisht informacioneve për rrezikun që i kanosej viktimës, prokurorja përgjegjëse kishte refuzuar të hapte rast për kanosje, ndërsa raporti evidentonte mangësi edhe në trajtimin e rastit nga disa institucione të tjera. Për shkak të këtyre dështimeve, lidhur me rastin janë suspenduar dy prokurore, duke përfshirë kryeprokuroren e Pejës, Lumturije Vuçetaj dhe prokuroren Arlinda Nallbani-Gacaferi. Ndërkohë, gjatë ditës u bë publike një tjetër letër e Arlindës e cila i drejtohej gjyqtarit të Gjykatës Themelore në Pejë, Migjen Kastrati, ku ajo shprehte shqetësimet për sigurinë personale dhe kërkonte mbrojtje e kujdestari për fëmijën. Në atë letër të datës 7 shtator 2026, e ndjera i ishte drejtuar gjyqtarit me mesazhin se «Për ju është rutinë, për mua është jetë dhe veç Zoti e di pse ty të ka zgjedhë të shpëtosh jetë». Vrasja e Arlinda Zekajt më 25 tetor në Vitomiricë të Pejës nga ish-kunati, Albert Sylaj, ka nxitur reagime të shumta dhe kërkesa për përgjegjësi institucionale për mënyrën se si janë trajtuar paralajmërimet e saj.