Gent Maksutaj vritet në Uppsalë, arrestohet i dyshuar
Pse dyshohet se vrasja e 20-vjeçarit nga Kosova ishte një ekzekutim i planifikuar?
UPPSALA — Gent (Milot) Maksutaj, 20-vjeçar nga fshati Banjë i Istogut në Kosovë, ka mbetur i vrarë mbrëmjen e së dielës në qytetin e Uppsalës, Suedi. Ngjarja ndodhi rreth orës 21:00 në zonën Kvarngärdet, pasi policia mori njoftim për të shtëna me armë zjarri.
Sipas mediave suedeze, vrasja dyshohet të ketë qenë një ekzekutim i planifikuar. I dyshuari ka lëvizur me biçikletë, e ka qëlluar fillimisht Maksutajn, dhe pasi ai ka rënë në tokë, dyshohet se e ka qëlluar sërish. Pas krimit, i dyshuari raportohet se është larguar me tren drejt Stokholmit, ku më pas është arrestuar nga policia.
Prokuroria suedeze ka bërë të ditur se në lidhje me ngjarjen është ndaluar një person nën moshën 18 vjeç. Hetuesit nuk përjashtojnë mundësinë që në vrasje të jenë përfshirë edhe persona të tjerë. Autoritetet suedeze vijojnë hetimet për të zbardhur motivin e krimit dhe nuk kanë konfirmuar ende nëse vrasja lidhet me grupet e krimit të organizuar.
Burimet: Report Tv, Tetova Sot, Bota Sot, Top Channel
— Redaksia ZHURMA