Gashi: Pasuria e paligjshme duhet të konfiskohet dhe t'u kthehet shtetit

Kryeprokurori i Shtetit, Zejnulla Gashi, ka marrë pjesë në një takim kushtuar shkëmbimit të përvojave mbi hetimet financiare dhe konfiskimin në rastet e korrupsionit, organizuar nga Zyra e Kryeprokurorit të Shtetit, UNDP, UNODC dhe Instituti i Bazelit për Qeverisje.

Në fjalën e tij, Gashi theksoi se lufta kundër korrupsionit dhe krimeve komplekse nuk mund të mbështetet vetëm te ndjekja penale, por kërkon edhe hetime financiare, gjurmim, sekuestrim dhe konfiskim të pasurisë që buron nga veprimtaria kriminale. Ai vlerësoi takimin si mundësi për të rritur bashkëpunimin ndërmjet vendeve pjesëmarrëse dhe për të shkëmbyer ekspertiza sipas standardeve profesionale.

“Pasuria e përfituar në mënyrë të kundërligjshme duhet të gjurmohet, të sekuestrohet dhe të konfiskohet përfundimisht dhe të ardhurat e fituara në mënyrë të kundërligjshme t’i kthehen shtetit dhe të dëmtuarve që kanë pësuar nga veprimtaritë kriminale”, deklaroi Gashi.

Në takim morën pjesë kryeprokurorë dhe prokurorë nga Kosova, përfaqësues të institucioneve ligjzbatuese, të SPAK-ut nga Shqipëria, prokurorë nga Sarajeva, si dhe udhëheqës të Zyrave për Rikthimin e Aseteve nga Kosova, Shqipëria dhe Bosnja e Hercegovina.

Burimet: Telegrafi; Epoka e Re; Zëri; Lajmi.net; Ekonomia Online (klaster 5 outlets).