Çfarë rrezikon zhvillimi i nofullës së fëmijëve nga frymëmarrja me gojë?
Pse ortodontja Pasionare Xharra-Budima e quan alarmante këtë zakon tek fëmijët?
PRISHTINË — Frymëmarrja përmes gojës tek fëmijët nuk është e padëmshme, paralajmëron ortodontja Pasionare Xharra-Budima. Në podcastin “Shëndeti në rend të parë”, ajo shpjegoi se kjo mund të ndikojë drejtpërdrejt në zhvillimin e nofullës së sipërme dhe të shkaktojë probleme ortodontike në të ardhmen.
“Shpeshherë zhvillimi i nofullës së sipërme ndërlidhet me frymëmarrjen. Meqenëse kulmi i gojës është dyshemeja e hundës, supozohet që me zgjerimin e nofullës së sipërme përmirësohet edhe frymëmarrja”, tha Xharra-Budima. Ajo theksoi se problemi zakonisht nuk fillon te nofulla, por te pengesat në rrugët e frymëmarrjes — alergjitë kronike, riniti kronik apo adenoidet e zmadhuara.
Kur fëmija merr frymë me gojë, gjuha zbret poshtë, ndërsa në kushte normale ajo duhet të mbështetet në qiellzë. “Gjuha është një muskul shumë i fuqishëm dhe ndikon drejtpërdrejt në formimin e nofullës së sipërme”, shtoi ajo. Pa këtë mbështetje, nofulla e sipërme nuk zhvillohet normalisht.
Burim: Telegrafi
— Redaksia ZHURMA