Franca mposht Suedinë 3-0 në 1/16-at e Botërorit

NEW JERSEY — Franca e nisi me ritëm të lartë sfidën e 1/16-ave të Botërorit në “MetLife Stadium”, por shifrat u hapën vetëm në fundin e pjesës së parë. “Gjelat” e mbyllën takimin me rezultatin 3-0 ndaj Suedisë dhe siguruan biletën për në raundin e ardhshëm të kompeticionit.

Ylli i “Gjelave”, Kylian Mbappe, zhbllokoi takimin në minutën e 45-të, kur lëvizi bukur brenda zonës dhe me të djathtën tundi rrjetën. Kapiteni francez kishte kërkuar gjatë gjithë pjesës së parë; madje pati shënuar edhe në të 20-tën, por goli iu anulua nga anësori për pozicion jashtë loje.

Pjesa e dytë nisi ashtu si e para. Në minutën e 53-të, Barcola mori një top brenda zonës dhe përballë portierit nuk gaboi, duke e dyfishuar epërsinë. Suedezët, që ishin kualifikuar si një nga vendet e treta më të mira, tashmë e ndienin peshën e dy golave të Francës.

Mbappe nuk u ndal. Në minutën e 74-të, Olise pasoi për kapitenin francez, i cili shënoi golin e tretë dhe të dytin personal të mbrëmjes. Me dyshen e tij, kapiteni i dha goditjen përfundimtare ëndrrës suedeze për një surprizë në New Jersey.

Francës nuk i munguan momentet kur u ndal nga shtyllat. Në të 32-tën, Kounde hodhi një top për Mbappe, por topi u përplas në shtyllë, ndërsa në të 36-tën një roveshatë e Olise mbeti po ashtu te shtylla. Po ashtu, një supergol i Olise-s u mohua gjatë takimit.

Portieri suedez Zetterstrom ishte protagonist në pjesën e parë, duke ndalur disa herë Mbappen, Digne dhe Rabiot nga distanca. Në anën tjetër, Maignan iu përgjigj Isak në minutën e 3-të dhe Gyokeres në të 89-tën, kur sulmuesi provoi brenda zonës, por nuk gjeti rrugën e rrjetës.

Me këtë fitore, Franca kalon në 1/8-at e Botërorit, ku do të përballet me Paraguain, ndërsa për Suedinë aventura amerikane mbyllet këtu. “Gjelat” duket se e kanë gjetur formën në momentin e duhur të turneut.

Burim: Top Channel
— Redaksia ZHURMA