Pse protestuesit po mbledhin firma për të dërguar në SPAK librin e Edi Ramës?

TIRANË — Gjatë protestës së 31-të radhazi të zhvilluar para Kryeministrisë, qytetarët kanë nisur mbledhjen e firmave për të dërguar në SPAK librin e promovuar nga kryeministri Edi Rama, "Albania Files". Ky botim prej 700 faqesh ekspozon të gjitha projektet që planifikohen të ndërtohen në vend.

Në këtë protestë masive, sheshi para Kryeministrisë ishte i mbushur me mijëra qytetarë me flamuj dhe pankarta. Protestuesit synojnë që përmes mbledhjes së firmave ta dorëzojnë këtë libër në Prokurorinë e Posaçme si një dokument që kërkon hetim të menjëhershëm nga organet e drejtësisë.

Lidhur me këtë çësijte, kryeministri Edi Rama deklaroi të dielën në podcast-in e tij "Flasim" se ai ka shkruar vetëm parathënien e këtij botimi. Rama theksoi se ky libër është tërësisht i pavarur dhe pasqyron kontributet e studiove arkitekturore që punojnë prej dy dekadash në Shqipëri.

Nga ana tjetër, ideja për ta trajtuar këtë libër si një dosje të gatshme hetimore për SPAK-un u hodh për herë të parë nga publicisti Fatos Lubonja. Ai u shpreh se botimi shërben si provë për të hetuar ndryshimin e ligjit për zonat e mbrojtura.

Sipas Lubonjës, ndryshimi i këtij ligji u hapi rrugë projekteve të resorteve turistike që ishin planifikuar përpara se kryeministri Rama të ndryshonte ligjin. Publicisti vuri në dukje se një pjesë e mirë e këtyre projekteve u hartuan kur zonat e mbrojtura ishin ende të paprekshme ligjërisht.

Lubonja theksoi se arkitektët u paguan për të bërë projekte në këto zona të mbrojtura pa pasur ende një ndryshim të ligjit që ta lejonte këtë veprim. Sipas tij, kjo dëshmon se planet ishin bërë para se të miratoheshin ndryshimet përkatëse ligjore.

Në thelb, publicisti ngriti pyetjen se kush do t'i zbatojë këto projekte, duke shtuar se ato do të kryhen nga krimi i organizuar dhe oligarkët shqiptarë. Lubonja përfundoi se kjo skemë e paracaktuar përfaqëson një rast të pastër të kapjes së shtetit.

Burim: Lapsi.al
— Redaksia ZHURMA