Çfarë tregojnë fotografitë e Fadil Berishës për bukurinë?

PRISHTINË — Në kuadër të Rame Lahaj International Opera Festival është hapur ekspozita “Before Beauty / After Beauty” e fotografit me famë ndërkombëtare Fadil Berisha, një prej artistëve shqiptarë që për katër dekada ka ndërtuar një karrierë të jashtëzakonshme në industrinë globale të modës, fotografisë dhe artit vizual. Për publikun e gjerë, emri i Fadil Berishës lidhet me portretet e figurave më të njohura të botës së modës, filmit dhe spektaklit.

Ekspozita paraqet një reflektim të gjerë mbi vetë nocionin e bukurisë, duke shfaqur imazhe që kanë qarkulluar në revista prestigjioze, fushata ndërkombëtare dhe platforma që kanë ndikuar drejtpërdrejt në mënyrën se si perceptohet estetika bashkëkohore. Megjithatë, ekspozita shkon përtej suksesit profesional dhe emrave të njohur, duke u fokusuar në dimensionin artistik përmes një dialogu mes industrisë globale të imazhit dhe rrënjëve kulturore.

Fotografitë e Berishës nuk mbeten të kufizuara në sistemet e industrisë së imazhit, por shfaqin jehona të kinemasë, glamurit dhe figurës ikonike, duke zhvendosur në trupa, vende dhe histori që zakonisht nuk konsiderohen si burim i këtyre narrativave. Sipas konceptit kuratorial, bukuria në fotografitë e tij nuk lind nga standardet e pandryshueshme, por nga prania, proporcioni dhe përmbajtja njerëzore.

Puna e Berishës mbështetet në një ndjenjë më të thellë të formës, të rrënjosur në Ballkan, ku bukuria lind nga proporcioni, përmbajtja dhe natyrshmëria, e jo vetëm nga idealet e imponuara. Duke punuar kryesisht me figura femërore, ai ka ndërtuar një arkiv të pasur imazhesh që dëshmojnë se bukuria nuk i përket një vendi të vetëm.

Ekspozita vjen si një udhëtim nëpër dekada krijimtarie, e bashkëkuruar nga Ovul O. Durmuşoğlu dhe Artan Korenica, duke sjellë para publikut fotografi që kanë lindur në qendrat më të rëndësishme të industrisë së modës, por që mbajnë gjurmë të qarta të identitetit të autorit. Artan Korenica tregoi se ka zgjedhur fotografi që nuk janë parë shpesh, duke u fokusuar tek vlera artistike dhe jo vetëm tek figurat e famshme.

Me fjalët e mirëseardhjes së tij, Rame Lahaj hapi edicionin e gjashtë të festivalit, duke theksuar kënaqësinë për të filluar me një emër të madh si Fadil Berisha. Në një intervistë, Berisha tha: “Për mua ka shumë rëndësi puna jem nëpër botë, por me kon këtu me punën tem është gjëja më e madhe në botë.” Ai foli edhe për rëndësinë e ekspozitës në Kosovë dhe për promovimin e bukurisë shqiptare, duke kujtuar sukseset e figurave si Marigona Dragusha dhe Zana Krasniqi, të cilat kanë fituar si femrat më të bukura në botë.

Ekspozita do të vazhdojë të qëndrojë e hapur nga data 4 deri më 31 korrik, nga e hëna deri të shtunën, në orarin 15:00–20:00, duke ofruar një dialog të vazhdueshëm me idenë e bukurisë dhe me veprën e Fadil Berishës.

Burim: Gazeta Tema, https://www.gazetatema.net/kulture/kater-dekada-bukurie-ne-objektivin-e-fadil-berishes-nje-ekspozite-qe-e-s-i571777
— Redaksia ZHURMA