Etno Fest vazhdon në Kukaj me shfaqjen ‘Pylli’ dhe Naim Bunjaku-Xuxin
Edicioni i 16-të i festivalit që zgjat nga 3 deri më 10 gusht këtë vit ka si temë qendrore 'Kujtesën'.
PRISHTINË — Edicioni i 16-të i festivalit Etno Fest vazhdon sonte në fshatin Kukaj të Prishtinës me një program që përfshin debate, koncert dhe teatër. Festivali, që mbahet nga 3 deri më 10 gusht, këtë vit zhvillohet nën temën qendrore 'Kujtesa' dhe sjell aktivitete që ndërthurin artin, kulturën dhe trashëgiminë.
Sipas programit për ditën e tretë, në orën 17:00 nis debati 'Dëshmi, dinjitet dhe shpresë' i organizuar nga KRCT. Më pas vijon koncerti nga Besarta Murtezani dhe Ansambli 'Dardanus' nga Tetova, si dhe shfaqja 'Pylli' e Florian Zeller nga Teatri 'Bekim Fehmiu' me regji të Erson Zymberit.
Aktivitetet e natës do të përmbyllen pas orës 21:30 me mbrëmjen festive 'Etno Neja' nën interpretimin e këngëtarit Naim Bunjaku-Xuxi. Ky organizim në fshatin Kukaj mbetet një nga ngjarjet më të rëndësishme verore në Kosovë që i kushtohet ruajtjes dhe kultivimit të artit dhe kulturës tradicionale.
Burim: KultPlus
— Redaksia ZHURMA
