Çfarë i përgjigjet qytetari Ramës: 'Nuk jam ti, mos e përdor fotografinë time'

TIRANË — Qytetari Erlis Sina i është përgjigjur këtë të martë kryeministrit Edi Rama, pasi ky i fundit publikoi në një postim fotografinë e tij nga protesta qytetare që po zhvillohet në Tiranë dhe që ka hyrë në ditën e 24-t.

"Mos më thuaj se te fotografia ime sheh veten tënde. Unë nuk jam ti. Nuk jam ai që ka pushtetin prej vitesh në dorë. Nuk jam ai që firmos vendime që ndryshojnë jetët e njerëzve", shkruan Sina në reagimin e tij në rrjetet sociale.

Ai e akuzon Ramën si "autor të emigrimit të mijëra të rinjve", të padrejtësive dhe të arrogancës së pushtetit. Sipas tij, qytetarët nuk dalin në shesh sepse i manipulon algoritmi apo ua kërkojnë influencerat, por sepse "jetojnë realitetin çdo ditë", raporton euronews.al.

Sina argumenton se protesta buron nga vështirësitë ekonomike, shërbimet publike dhe largimi i të rinjve nga vendi. Ai e akuzon kryeministrin se po përpiqet të minimizojë arsyet e revoltës qytetare.

"Fotografia ime në murin tënd më bën pis. Mos e përdor për të larë përgjegjësitë e tua. Mos e përdor për të fshehur dështimet e tua. Unë nuk jam ti", përfundon reagimin e tij.

Reagimi vjen pas mesazhit të gjatë të Ramës drejtuar protestuesve, ku kryeministri deklaroi se nuk i sheh si humbës, por si qytetarë të mbetur besnikë ndaj bindjeve dhe shqetësimeve të tyre. Ai pranoi probleme reale që lidhen me ekonominë, pronën, mjedisin, shëndetësinë apo padrejtësitë sociale, por argumentoi se zemërimi i qytetarëve shpesh shfrytëzohet nga aktorë politikë, komentatorë, influencerë dhe mekanizma të rrjeteve sociale, ndërsa u bëri thirrje protestuesve të mos lejojnë që hallet e tyre të përdoren nga të tjerët.

Pikërisht ndaj këtyre qëndrimeve dhe përdorimit të fotografisë së tij në postimin e kryeministrit, Erlis Sina publikoi kundërpërgjigjen, duke theksuar se është "thjesht një qytetar" dhe se pjesëmarrja e tij buron nga bindjet dhe përvoja personale, jo nga ndikimi i faktorëve politikë apo mediatikë. 5 kërkesat panegociueshme të protestuesve u publikuan pas 23 ditësh rezistencë.

Burim: Ekonomia Online
— Redaksia ZHURMA