Veliaj përballet vetë në Gjykatën Administrative me prokurorin Ols Dado
Avokati Plarent Ndreca kërkoi përfshirjen e Shoqatës për Media dhe Drejtësi në gjykim, ndërsa pala mbrojtëse e Dados e kundërshtoi këtë kërkesë.
TIRANË — Ka nisur në Gjykatën Administrative procesi gjyqësor mes kryebashkiakut të Tiranës, Erion Veliaj, dhe prokurorit Ols Dado. Në këtë seancë të parë, palët u paraqitën për të shqyrtuar kërkesat procedurale për përfshirjen e palëve të treta në procesin e hapur mes tyre.
Veliaj mori pjesë personalisht në sallën e gjyqit, i shoqëruar nga avokati i tij mbrojtës, Plarent Ndreca. Gjatë procesit, avokati Ndreca kërkoi zyrtarisht që Shoqata për Media dhe Drejtësi të pranohet si pjesë e procesit, duke argumentuar se ajo nuk duhet parë si paditëse, por si pjesëmarrëse aktive.
Nga ana tjetër, mbrojtja e Ols Dados kërkoi rrëzimin e kërkesës së kësaj shoqate për ndërhyrje kryesore në proces. Avokati i Dados argumentoi se çështja trajton një akt administrativ individual dhe se provat e dorëzuara deri më tani nga shoqata janë thjesht fletëthirrje për fazën paraprake përgatitore.
Përveç kësaj, gjatë seancës u bë me dije edhe kërkesa e ish-prokurorit Tom Dedaj për t'u përfshirë në proces. Gjykata njoftoi se vendimi për këto kërkesa të fazës përgatitore do të merret në përfundim të shqyrtimit ose çështja do të kalojë për gjykim.
Gjatë seancës ndodhi edhe një incident kur një grua tentoi të hynte në sallë si përfaqësuese e Veliajt. Pasi u verifikua se ajo nuk kishte licencë avokatie dhe nuk njihej nga asnjëra palë, gjykata vendosi ta referojë rastin për verifikim të mëtejshëm.
Burim: Ora News
— Redaksia ZHURMA