Erërat e forta shkaktojnë dëme në objekte në Drenas, komuna bën thirrje

Erërat e forta që kanë përfshirë vendin kanë shkaktuar dëme në disa objekte në Drenas, duke paraqitur rrezik për sigurinë e qytetarëve. Si pasojë e motit të keq, në rrugën “Adem Mulaj”, në afërsi të parkingut, një pjesë e kulmit të një ndërtese është shkëputur dhe ka rënë. Po ashtu, dëmtime serioze të kulmit janë evidentuar edhe në objektin e çerdhes së vjetër, ku ekziston rreziku që pjesë të tjera të tij të shkëputen.

Nga komuna kanë reaguar përmes një njoftimi, duke u bërë thirrje qytetarëve të tregojnë kujdes të shtuar gjatë lëvizjes dhe të shmangin qëndrimin pranë objekteve të dëmtuara. Gjithashtu, është kërkuar që qytetarët të mos parkojnë automjetet në hapësirat ku ekziston rreziku i rënies së materialeve nga kulmet, ndërsa është theksuar se siguria e qytetarëve mbetet prioritet.