Ekstradohet nga Kosova në Spanjë i kërkuari nga INTERPOL-i për rrëmbim fëmije

Policia e Kosovës ka njoftuar se ka ekstraduar nga Kosova për në Spanjë një shtetas të huaj, i cili kërkohej përmes INTERPOL-it me letër-rreshtim ndërkombëtar për veprën penale 'rrëmbim i fëmijës'.

Sipas Policisë, i dyshuari ishte arrestuar në Kosovë pasi ndaj tij ekzistonte një kërkesë ndërkombëtare e lëshuar nga institucionet e drejtësisë në Spanjë. Ekstradimi u realizua nga Drejtoria për Bashkëpunim Ndërkombëtar Policor, në koordinim me njësitet relevante të Policisë së Kosovës dhe institucionet e drejtësisë.

Pas përfundimit të procedurave të nevojshme ligjore, personi është dorëzuar tek autoritetet spanjolle. Policia ka bërë të ditur se ekstradimi është realizuar në përputhje me legjislacionin në fuqi dhe falë bashkëpunimit ndërinstitucional mes Republikës së Kosovës dhe Mbretërisë së Spanjës.

“Policia e Kosovës do të vazhdojë me shkëmbimin e informacioneve me institucionet vendore, shtetet dhe organizatat ndërkombëtare”, thuhet në njoftim.