Si u gjet e mitura që ishte zhdukur në Rahovec?
Pse u largua vajza nga shtëpia dhe ku e gjeti Policia pas katër ditësh kërkim?
RAHOVEC — Vajza e mitur që ishte raportuar e zhdukur më 19 qershor është gjetur në fshatin Xërxë, afër Rahovecit, mëson ekskluzivisht Gazeta Sinjali. Ajo ishte larguar nga shtëpia në rrugën "Sadedin Hajda" rreth orës 11:30, ndërsa babai i kishte njoftuar Policinë se familja nuk kishte pasur asnjë kontakt me të.
Katër ditë më vonë, më 23 qershor rreth orës 13:30, Policia mori informatë se e mitura ndodhej në një shtëpi në Xërxë. Personat që e njoftuan thanë se ajo kishte shkuar vetë atje dhe kishte shprehur dëshirën të bashkëjetonte me një familjar të tyre. Patrulla e shoqëroi menjëherë në Stacionin Policor të Rahovecit.
Hetuesit dhe Prokurori kujdestar u njoftuan për rastin. Me urdhër të prokurorit, e mitura do të intervistohet dhe më pas do të kthehet në shtëpinë e babait të saj. Rasti mbetet në trajtim nga organet kompetente.
Burim: Sinjali
— Redaksia ZHURMA