Dy infermierë ndalohen në Prizren për përvetësim të 2.282 euro
Masa e ndalimit 48-orëshe; hetimet nisën në qershor 2026 dhe mund të zgjerohen në periudha të tjera kohore.
PRIZREN — Prokuroria Themelore në Prizren ndaloi dy infermierë të Qendrës Kryesore të Mjekësisë Familjare (QKMF) në këtë qytet, nën dyshimin për veprën penale të "Përvetësimit në detyrë". Ata dyshohen se kanë përvetësuar paratë e arkëtuara nga pagesat e pacientëve për shërbime shëndetësore.
Sipas hetimeve të deritanishme, kryeinfermieri Xh.B. ka përvetësuar në vlera të vogla monetare shumën prej 1.250 euro, ndërsa infermieri B.R. 1.032 euro. Shuma e përgjithshme e mjeteve financiare të dyshuara të përvetësuara arrin në 2.282 euro, thuhet në njoftimin e Prokurisë.
Përvetësimi dyshohet të ketë ndodhur gjatë orarit të punës, konkretisht në ndërrimet e natës në QKMF-Prizren, në periudhat nga muaji gusht deri nëntor 2024, si dhe nga muaji shkurt deri dhjetor të vitit 2025. Hetimi ka nisur në qershor 2026, me autorizim të Prokurorit të Shtetit dhe në bashkëpunim me Policinë e Kosovës.
Pas intervistimit në prani të mbrojtësve, të dyshuarve u është caktuar masa e ndalimit për 48 orë. Prokuroria Themelore do të vlerësojë kërkesën për sigurimin e pranisë së të pandehurve, ndërsa nuk përjashton zgjerimin e hetimit në periudha të tjera kohore.
Burim: Ekonomia Online
— Redaksia ZHURMA