Drenica luan me Dritën dhe Prishtina përballet me Vushtrrinë

Superliga e Kosovës vazhdon me dy sfida të tjera interesante në kuadër të xhiros së 13-të, ku të dyja ndeshjet do të nisin nga ora 13:00. Ndeshja më interesante zhvillohet në Skënderaj, ku Drenica do të jetë nikoqir i kampionit të Kosovës, Dritës, me vendasit që synojnë të kthehen te rezultatet pozitive njësoi si mysafirët që u mposhtën në shtëpi nga Prishtina në xhiron e fundit. Në anën tjetër, Prishtinën e pret një sfidë e lehtë në letër si mysafir i Vushtrrisë, klub që thuhet se la mbrapa problemet e brendshme. Bardhëkaltërit kanë rastin e artë për t’u shkëputur sërish në krye, mirëpo nuk duhet ta nënvlerësojnë kundërshtarin e tyre që nuk është në formë.