Si mbeti diskoteka 'Pulse' jashtë kontrolleve të DMSH-së?
Prokuroria paraqiti prova se DMSH e Koçanit nuk e kishte përfshirë 'Pulse' në planet e kontrollit për vite me radhë.
SHKUP — Prokuroria paraqiti sot prova se diskoteka ilegale "Pulse" në Koçan nuk ishte përfshirë në planet vjetore të kontrollit të Drejtorisë për Mbrojtje dhe Shpëtim (DMSH). Sipas dokumenteve, në territorin e komunës së Koçanit nuk është realizuar asnjë kontroll i planifikuar apo i jashtëzakonshëm gjatë vitit 2016, dhe asnjë inspektor nuk ishte caktuar për këto detyra.
Dokumentet e viteve 2012, 2013 dhe 2014 tregojnë mungesë kritereve të qarta për vlerësimin e rrezikut. Planet e DMSH-së përfshinin vetëm hotele, restorante dhe motele, ndërsa diskotekat dhe klubet kishin mbetur jashtë sistemit të mbikëqyrjes. Katër drejtorë të DMSH-së janë të akuzuar në këtë rast, përfshirë Xhevad Selamin, i cili ishte në detyrë kur ndodhi tragjedia më 16 mars 2025.
Në zjarrin që shpërtheu në "Pulse" humbën jetën 63 persona dhe mbi 200 u plagosën. Procesi gjyqësor me 35 të akuzuar ndodhet ende në fazën e paraqitjes së provave materiale.
Burim: Telegrafi
— Redaksia ZHURMA