Çfarë rrezikojnë udhëtarët e diasporës nëpër Serbi?
Raste ndalimesh, kontrollesh të zgjatura dhe arrestimesh nga Serbia janë raportuar, përfshirë arrestimin e fundit të Osman Selmanit.
PRISHTINË — Ministria e Punëve të Jashtme dhe Diasporës (MPJD) u bën thirrje qytetarëve të Kosovës, përfshirë bashkatdhetarët në mërgatë, që të përdorin rrugë alternative dhe të shmangin kalimin përmes Serbisë. Arsyeja: raste të ndalimeve, kontrolleve të zgjatura dhe arrestimeve të qytetarëve kosovarë nga autoritetet serbe. Para pak ditësh, Serbia arrestoi Osman Selmanin, nën dyshime për krime lufte gjatë vitit 1999.
Gjatë sezonit të pushimeve, numri i mërgimtarëve që udhëtojnë drejt Kosovës rritet ndjeshëm, ndërsa shumica kalojnë nëpër pikat kufitare me Serbinë. Autoritetet serbe kanë raportuar edhe raste të tjera ndalimesh dhe marrjesh në pyetje, kryesisht nën akuza për shkelje të rendit kushtetues të Republikës së Serbisë.
Ministria ka përsëritur thirrjen për kujdes dhe ka apeluar bashkatdhetarët të zgjedhin rrugë alternative për të shmangur situata të papërshtatshme gjatë kalimit nëpër Serbi. Përmes Zyrës Ndërlidhëse të Republikës së Kosovës në Serbi, monitorohen dhe trajtohen të gjitha rastet e raportuara nga qytetarët ose familjarët e tyre.
Ministria gjithashtu njofton vazhdimisht delegacionin e Bashkimit Evropian në Serbi dhe ka dërguar nota verbale pranë misioneve diplomatike të vendeve të Quint-it të akredituara në Serbi. Kjo thirrje nuk është e para: ministria e ka përsëritur gjatë viteve të fundit, ndërkohë që raste të ngjashme ndalimesh e arrestimesh vazhdojnë të raportohen.
Burim: Albinfo.ch
— Redaksia ZHURMA