Diaspora zbret në protesta kundër Ramës — nisin më 14 gusht
Aktivisti Bledi Meti deklaroi se më 14, 15 dhe 16 gusht do të ketë organizime qytetare, të ndjekura nga një mobilizim më i madh në mes të shtatorit.
TIRANË — Aktivisti i diasporës shqiptare në Londër, Bledi Meti, ka paralajmëruar organizimin e protestave të reja kundër kryeministrit Edi Rama gjatë muajve gusht dhe shtator. Sipas tij, komuniteti i organizuar jashtë vendit do të kthehet në Shqipëri për të kërkuar ndryshime politike dhe për të kundërshtuar qeverisjen aktuale.
Meti bëri të ditur se aktivitetet e para do të zhvillohen më 14, 15 dhe 16 gusht, të cilat do të mbështeten nga shqiptarët e Britanisë së Madhe, Gjermanisë, Francës dhe shteteve të tjera europiane. Ky organizim përkon me kohën kur shumë emigrantë kthehen për pushime pranë familjeve të tyre.
Një tjetër valë e mobilizimit është caktuar mes datave 12 dhe 19 shtator, që cilësohet si “kthimi i tretë” për të qëndruar në shesh. Ky aksion vjen pasi edhe më herët një shqiptar nga diaspora u bashkua protestës në Tiranë kundër Ramës, duke shfaqur revoltën e komunitetit ndaj kabinetit qeveritar.
Aktivisti deklaroi se kryeministri Rama e ka humbur legjitimitetin dhe pretendoi se edhe brenda qeverisë ka zyrtarë që nuk pajtohen me mënyrën e drejtimit të vendit. Meti shtoi se ka vizituar Belgjikën, Holandën, Zvicrën dhe Italinë për të bashkuar shqiptarët në këtë kauzë.
Burim: BalkanWeb
— Redaksia ZHURMA
