Dezinformimi gjatë protestave në Shqipëri zhvendoset te viktimat dhe siguria

Protestat e fundit kundër Qeverisë së kryeministrit Edi Rama janë shoqëruar me valë informacionesh të pavërteta ose të pakonfirmuara në rrjetet sociale, të cilat sipas kryeredaktores së platformës Faktoje.al, Nevila Gjata, ndryshojnë nga narrativat e mëhershme gjeopolitike duke u fokusuar te ngjarjet konkrete, viktimat e pretenduara dhe siguria. Gjatë datave 13-16 tetor u përhapën pretendime për protestues të intubuar, persona në koma dhe viktima, përfshirë një të ri nga Tetova, të cilat u mohuan nga Ministria e Shëndetësisë, Spitali i Traumës dhe verifikimet në terren. Po ashtu, u hodhën poshtë pretendimet për rrëmbimin e vajzave në Qytetin Studenti dhe praninë e policëve të huaj, ku sipas verifikimeve një fotografi e përdorur si dëshmi doli të ishte e gjeneruar me inteligjencë artificiale.

Këto dezinformime janë përhapur ndërkohë që janë dokumentuar edhe raste reale të dhunës policore, për të cilat drejtori i Përgjithshëm i Policisë, Skënder Hita, konfirmoi përdorimin e gazit lotsjellës, topave të ujit dhe plumbave të gomës. Policia e Shtetit pezulloi shtatë efektivë dhe nisi hetime disiplinore, ndërsa Avokati i Popullit, Endri Shabani, ndërmori një hetim administrativ dhe njoftoi se kishte kontaktuar 214 persona të privuar nga liria deri më 16 tetor, duke evidentuar ankesa për dhunë, mungesë kujdesi mjekësor dhe shkelje të të drejtave të të miturve. Nga ana tjetër, sipas Ministrisë së Shëndetësisë, gjatë pesë ditëve nga 13 deri më 17 tetor, gjithsej 272 persona kërkuan ndihmë mjekësore, ku përfshiheshin 169 punonjës policie, 82 protestues dhe 21 kalimtarë.