Kremrat e diellit janë më të sigurt se sprejet — era zbeh mbrojtjen
Aplikimi i pabarabartë dhe humbja e produktit në ajër nga era zvogëlojnë nivelin e mbrojtjes gjatë përdorimit të sprejit.
NJU JORK — Dermatologët rekomandojnë përdorimin e kremrave mbrojtës ndaj diellit si zgjedhjen më të sigurt krahasuar me sprejet, ndonëse të dyja produktet janë teorikisht po aq efektive kur aplikohen saktë. Përdorimi i pabarabartë dhe në sasi të pamjaftueshme i sprejit shpesh zvogëlon mbrojtjen reale të lëkurës.
Faktori SPF tregon kohëzgjatjen që një person mund të qëndrojë në diell pa u djegur, krahasuar me lëkurën e pambrojtur. Megjithatë, Dr. Vivian Chin shpjegon se udhëzimet nuk ndiqen saktësisht, pasi njerëzit shpesh nuk e aplikojnë produktin gjysmë ore para daljes apo nuk e riaplikojnë çdo dy orë.
Sprejet janë mjaft të njohura për shkak të formulës së lehtë dhe jo të yndyrshme, por ato paraqesin vështirësi në mbulimin e barabartë të trupit. Një pjesë e madhe e produktit të spërkatur përfundon në ajër për shkak të erës, duke mos arritur të mbrojë lëkurën e synuar.
Për to shmangur këtë, specialistët këshillojnë spërkatjen e produktit në duar përpara aplikimit në fytyrë ose trup. Dr. Mitchell paralajmëron se në planin afatgjatë nevojitet një sasi dukshëm më e madhe e sprejit sesa e kremit për të siguruar mbrojtjen e nevojshme nga rrezet e diellit.
Nga ana tjetër, kremrat tradicionalë lejojnë mbulim të plotë sepse përdoruesi mund të shohë saktësisht çdo zonë ku po e aplikon atë. Gjithsesi, sprejet mbeten më praktike për pjesë specifike si skalpi i kokës, ku kremi është i vështirë të shtrihet pa shkaktuar yndyrosje.
Dermatologia Adrienne O'Connell sugjeron shmangien e spërkatjes direkte në fytyrë për shkak të rrezikut të irritimit të mushkërive nga thithja e aerosoleve. Ajo preferon kremrat për fytyrë sepse ato përmbajnë përbërës hidratues dhe anti-plakje, si acidi hialuronik, duke shmangur edhe njollat e bardha.
Ekspertët konfirmojnë se kombinimi i të dyja produkteve është i sigurt për të arritur mbrojtjen maksimale. Një person mund të përdorë një krem të veçantë për fytyrën dhe një sprej për pjesët e tjera të trupit ku aplikimi me dorë është më i vështirë.
Burim: Klan Kosova
— Redaksia ZHURMA
