Demo takohet në Romë me Piantedosin për sigurinë dhe dokumentet

Ministri i Punëve të Brendshme, Ervin Demo, zhvilloi një takim zyrtar në Romë me homologun e tij italian, Matteo Piantedosi, ku në fokus të bisedimeve ishin tri çështje kryesore. Sipas njoftimit të ministrisë, palët diskutuan për zhvillimin e Akademisë së Sigurisë sipas përvojës italiane, përfundimin e marrëveshjeve në fushën e sigurisë dhe njohjen automatike në Itali të certifikatave të lindjes të lëshuara përmes platformës e-Albania.

Gjatë takimit u trajtua e ardhmja e Akademisë së Sigurisë, me synimin që formimi profesional i punonjësve të policisë të mbështetet te modeli italian, përmes përmirësimit të programeve të studimit, forcimit të përgatitjes praktike dhe programit vjetor të trajnimeve. Po ashtu, dy ministrat diskutuan për marrëveshjet në fushën e sigurisë që ndodhen në fazën përfundimtare për t'u firmosur, si dhe për intensifikimin e bashkëpunimit policor përmes shkëmbimit të informacionit në kohë reale, zgjerimit të skuadrave të përbashkëta hetimore dhe koordinimit për identifikimin e kapjen e personave në kërkim.