Agjenti francez që i prezantonte modele Epsteinit gjendet i vdekur në Paris

PARIS — Daniel Siad, një agjent francez i modeleve, i cili për më shumë se një dekadë dyshohet se organizonte takime mes grave të reja nga industria e modelimit dhe të dënuarit për abuzim seksual Jeffrey Epstein, është gjetur i vdekur në banesën e tij në Colombes, periferi të Parisit. Lajmi u konfirmua nga zëvendësprokurorja e Gjykatës së Nanterre, Marie-Celine Loverisy, e cila bëri të ditur se do të kryhet autopsia për të përcaktuar shkaqet e sakta të vdekjes.

Pak para se të ndërronte jetë, Siad kishte dhënë një intervistë për CNN, ku pretendonte se nuk kishte dijeni se dy gra, të cilat ai ia kishte prezantuar Epsteinit, e kishin akuzuar më pas financierin amerikan për abuzim seksual. Sipas tij, Epstein e kishte bindur se pas dënimit të vitit 2008 kishte paguar për krimet e kryera dhe se ngjarje të tilla nuk do të përsëriteshin më.

Dokumentet e publikuara nga Departamenti Amerikan i Drejtësisë tregojnë se Jeffrey Epstein i kishte paguar Siadit dhjetëra mijëra dollarë. Në të njëjtat dosje përfshihen mesazhe ku agjenti francez e informonte Epstein për gra të reja që kishte takuar, ndërsa në disa raste i dërgonte fotografi të modeleve ose kandidateve për asistente.

Një modele e kishte denoncuar për përdhunim, duke pretenduar se ngjarja kishte ndodhur në vitin 1990, kur ai punonte në Francë. Siad i kishte mohuar vazhdimisht akuzat. Lidhjet e Epsteinit me industrinë e modës vazhdojnë të jenë objekt hetimi, ndërsa në Francë ishte në zhvillim një hetim penal ndaj Siadit, i cili akuzohej edhe për sulm seksual.

Burim: Shekulli, https://shekulli.com.al/2026/07/22/organizonte-takime-mes-vajzave-dhe-epstein-gjendet-i-vdekur-agjenti-francez-pak-dite-me-pare-kishte-folur-per-cnn/

— Redaksia ZHURMA