Çitaku: Telefonata për presidenten Justina Shiroka-Pula erdhi nga PDK-ja e jo nga Kurti

Presidentja e Kosovës, Justina Shiroka-Pula, telefonatën me propozimin për këtë post nuk e ka marrë nga lideri i Lëvizjes Vetëvendosje, Albin Kurti, por nga Grupi Parlamentar i Partisë Demokratike të Kosovës. Ushtruesja e detyrës së kryetares së PDK-së, Vlora Çitaku, zbuloi këto detaje nga nata e 6 tetorit, kur u votua edhe Ligji për Gjykatën Speciale.

Zgjedhja e kryetares së re të shtetit u bë gjatë mesnatës mes 6 dhe 7 tetorit në një seancë të jashtëzakonshme të Kuvendit të Kosovës. Shiroka-Pula siguroi 81 vota të deputetëve në raundin e parë, duke i dhënë fund ngërçit politik që zgjaste prej më shumë se një viti dhe duke parandaluar kështu zgjedhjet e reja parlamentare në vend.

Gjatë një interviste në emisionin «Rubikon», Çitaku tregoi se nata e votimit ishte natë dramatike me shumë zhvillime brenda pak orëve. Ajo mohoi pretendimet se kandidatja u caktua nga Kurti, duke sqaruar se kandidati i parë i liderit të VV-së kishte qenë Bekim Sejdiu. Zyrtarja e PDK-së njoftoi se biseda telefonike për marrjen e lejes u zhvillua në spikerfon brenda grupit parlamentar, por nuk përmendi emrin e veçantë të personit që e telefonoi.

Çitaku sqaroi po ashtu se kryetari Bedri Hamza nuk kishte diskutuar për emra konkrete me Kurtin deri në ato momente. Nga ana tjetër, Vetëvendosje dhe Kurti e kishin pranuar po atë natë mungesën e një kontakti të drejtpërdrejtë me kryetaren e Akademisë së Shkencave dhe Arteve të Kosovës. Në konferencën e tij të tretë për media para mesnatës, Kurti i kishte kërkuar publikisht PDK-së që ta bindte atë, duke përmendur përvojën e saj të mëparshme si ministre e asaj partie.

Ushtruesja e detyrës së kryetares së PDK-së u shpreh me besim të plotë për figurën e presidentes së re, duke nëvizuar se ajo është një grua me integritet që do ta ruajë këtë pozitë pesëvjeçare dhe nuk do të shërbejë si vegël e asnjë subjekti politik.

«Zonjën Justina Shiroka-Pula, kur e kemi ftuar, kur e kemi thirrur atë natë në telefon për t’i kërkuar lejen, ajo telefonatën nuk e ka pranuar nga z. Kurti, e ka pranuar nga Grupi Parlamentar i PDK-së», ka thënë Çitaku.

«Nuk kisha me thanë se ai e caktoi kandidatin, se kandidati i tij ka qenë dikush tjetër. Ka qenë fillimisht z. Bekim Sejdiu», është shprehur më tej ajo.

«E dimë saktësisht që nuk është vegël politike partiake e askujt. Një grua me integritet, një grua e cila këtë pozitë pesëvjeçare do ta ruajë edhe për hir të trashëgimisë së saj, nuk do ta njollosë zonja Shiroka-Pula veten. Ne i besojmë», ka thënë Çitaku.

«Ajo ka qenë ministre e PDK-së, le ta bind kryetari Bedir Hamza, unë jam dakord», kishte thënë Kurti në konferencë për media, pak para mesnatës.