Çfarë sjell Ibrahim Kadriu me romanin 'Ikja si shpëtim'?

PRISHTINË — Gjatë ditës së tretë të edicionit të 26-të të Panairit të Librit në Prishtinë, shtëpia botuese Botimet KOHA ka promovuar romanin e ri të shkrimtarit Ibrahim Kadriu, të titulluar “Ikja si shpëtim”. Kjo vepër e re sjell në qendër dramën e individit shqiptar përballë shtypjes së egër shtetërore dhe burgut politik.

Autori Ibrahim Kadriu, i cili njihet si dëshmitar i epokave dhe mjeshtër i romanit socio-historik, është përkthyer në 11 gjuhë të huaja dhe numëron mbi 100 vepra të botuara. Ky botim i ri shënon romanin e tij të nëntë që vjen si bashkëpunim me Botimet KOHA.

Në përurimin e organizuar të premten pasdite, shkrimtari dhe studiuesi Xhevat Syla vlerësoi lart krijimtarinë e pasur të Kadriut që nga vitet e gjashtëdhjeta. Syla theksoi se shkrimtari ka treguar një produktivitet të jashtëzakonshëm letrar, duke botuar shpesh edhe më shumë se një libër brenda vitit.

Vetë autori Kadriu u shpreh shkurtimisht se ende nuk e ka lexuar librin e sapobotuar në formën e tij fizike. Ai pranoi se leximi i veprës pas botimit shpesh i shkakton nervozizëm, pasi atëherë fillojnë të dallohen ato zbrazëtira të pashmangshme që shfaqen gjithmonë pas shtypit.

Romani përshkruan fatin e personazhit kryesor, Mal Coli, i cili kalon përmes izolimit dhe ndarjes së dhimbshme nga familja. Kjo periudhë e vështirë në qeli shërben gjithashtu si një mundësi për të reflektuar mbi lirinë, kuptimin e ekzistencës dhe ruajtjen e kujtesës në rrethana shtypëse.

Në leximin e tyre, studiuesit Labinot Berisha dhe Avni Spahiu vlerësuan analizën e mekanizmave të pushtetit shtypës. Berisha shpjegoi se figura e të burgosurit politik shndërrohet në simbol të qëndresës morale, kurse burgosja synon zhdukjen e dinjitetit dhe identitetit përmes një riformësimi të detyruar shoqëror.

Sipas Berishës, në këtë ambient ku heshtja shndërrohet në mjet mbijetese, institucioni i spiunimit shkatërron solidaritetin njerëzor. Ai shtoi se personazhi kryesor e përcjell vetminë pikërisht si një nga format më të rënda të torturës psikologjike të cilën pushteti ua imponon atyre që guxojnë të rezistojnë.

Burim: Koha.net
— Redaksia ZHURMA