Çfarë po ndodh me këmbët tona në vapë?

TIRANË — Vapa dhe nxehtësia shpesh sjellin enjtje të këmbëve dhe rënie të energjisë, edhe pa ndonjë patologji themelore. Specialisti i bimëve mjekësore Ylli Merja shpjegoi në emisionin "Rreze Dielli" të Report Tv se, në temperatura të larta, venat varikoze fryhen dhe humbasin fuqinë e kontraktimit, duke shkaktuar ndezje të këmbëve.

Por Merja paralajmëroi se enjtja mund të tregojë probleme më serioze. Nëse keni gulçim në kraharor, kollë ose sekrecione me gjak, duhet të shkoni te mjeku për ekzaminime — kjo sinjalizon insuficiencë kardiake. Nëse ju enjtet vetëm njëra këmbë, problemi mund të jetë te veshka ose mëlçia; nëse ju enjten të dyja këmbët, kjo tregon problem nga zemra dhe Merja këshillon vizitë te kardiologu.

Midis bimëve lehtësuese, Merja rekomandoi artkiumlapën — të njohur si "rrodhja e madhe" — pa e ngatërruar me gjembaçin e gomarit. Rrënja e saj, që gjendet në toka të thata gurishtore, largon toksinat dhe tonifikon qarkullimin e gjakut, duke ngushtuar venat varikoze; ziehet në gjysmë litri ujë dhe pihet gjatë ditës. Gjethet përdoren për kompresa në rast irritimesh të lëkurës.

Një çaj tjetër kombinon gjethet e gingobilobës me rrënjët e artkiumlapës, të pasuruara me mëndër të butë për tretjen, ose me fruta pylli e ziera 3-4 minuta për uljen e kolesterolit. Kjo përzierje heq lodhjen e këmbëve dhe përforcon sistemin venoz; verës mund të pihet edhe e ftohtë, me feta kastraveci ose limon.

Hithrat janë një zgjidhje tjetër: çaji i tyre tonifikon, nxit diurezën dhe largon kripën e ujërat e tepërta nga trupi; mund të përdoren edhe në byrek, me lakra të egra dhe majdanoz. Merja kujtoi se ënjtja e njëkohshme e këmbëve, duarve dhe kapakëve të syve sinjalizon problem te veshkat.

Nëse këmbët fryhen natën dhe shputat digjen, kjo tregon qarkullim të dobët të gjakut. Merja sugjeroi një zgjidhje praktike: në darkë, mbajini këmbët 15-20 minuta në një legen me ujë të ftohtë, kripë dhe uthull molle, që kontraktojnë enët e gjakut dhe heqin ndezjen, duke përmirësuar qarkullimin venoz.

Një përzierje tjetër përdor degë pishe deti: lastarët e zhveshur nga gjethet ziejnë 2-3 minuta në një litër ujë, bashkë me lëvore pishe, boronicë dhe fruta pylli, duke sjellë përmirësim të qarkullimit venoz.

Burim: Shqiptarja
— Redaksia ZHURMA