Çfarë përvojë ndërkombëtare sjell portieri i ri i Malishevës?

MALISHEVË — Klubi i Malishevës ka vazhduar përforcimin e skuadrës, duke zyrtarizuar transferimin e portierit boshnjak Adnan Kanuric, 24 vjeç, i cili tashmë do të mbrojë portën e nënkampionëve të Kosovës.

Në njoftimin zyrtar të klubit thuhet: "Klubi ynë ka arritur marrëveshje me portierin Adnan Kanuric, i cili tash e tutje do të mbrojë ngjyrat tona. Kanuric sjell përvojë të pasur ndërkombëtare, pasi ka qenë pjesë e klubeve si Stoke City, Nottingham Forest, FK Sarajevo dhe Palermo. Së fundmi, ai ishte pjesë e Austria Klagenfurt, duke sjellë me vete eksperiencë të vlefshme nga Anglia, Sllovakia, Bosnja, Italia dhe Austria".

Malisheva e mbylli sezonin e fundit të Superligës së Kosovës në vendin e dytë, duke siguruar pjesëmarrjen në kualifikimet e Conference League. Në raundin e parë kualifikues, skuadra do të përballet me Vllazninë e Shkodrës.

Transferimi i Kanuric është pjesë e strategjisë së klubit për të ngritur nivelin e performancës përballë sfidave të reja, duke synuar rezultate më të mira në kompeticionet vendase dhe evropiane.

Burim: Zëri
— Redaksia ZHURMA