Çfarë ofron Albas për të përmirësuar cilësinë e teksteve shkollore?

PRISHTINË — Në prag të përzgjedhjes së teksteve shkollore për vitin mësimor 2026/2027, Albas fton mësimdhënësit të shqyrtojnë me kujdes tekstet e miratuara dhe materialet përcjellëse. Qëllimi është që përzgjedhja të bazohet në cilësi, vlera pedagogjike dhe nevojat reale të nxënësve.

Sipas njoftimit, teksti mësimor nuk është thjesht një burim informacioni, por një mjet kyç që ndikon drejtpërdrejt në cilësinë e mësimdhënies dhe të nxënit. Për të mbështetur punën e mësimdhënësve, Albas ka pajisur të gjitha tekstet e miratuara me një paketë të plotë planifikuese dhe vlerësuese.

Kjo paketë përfshin plane vjetore, mujore, javore dhe ditore, si dhe teste, aktivitete, projekte dhe një ditar personal për mësimdhënësin. Materialet synojnë ta lehtësojnë planifikimin, organizimin e orëve mësimore dhe procesin e vlerësimit, duke e bërë punën në klasë më të strukturuar dhe efikase.

Në njoftim theksohet se mësimdhënësi është "shtylla kryesore e çdo reforme në arsim". Për këtë arsye, çdo material që mbështet përgatitjen dhe organizimin e mësimit konsiderohet një investim në cilësinë e arsimit. Mësimdhënësit inkurajohen të bëjnë përzgjedhjen mbi bazën e meritës dhe cilësisë.

Për ndihmë ose informacione shtesë, mësimdhënësit mund të kontaktojnë Albas në adresën albas_pr@yahoo.com.
*Burim: Insajderi*
— Redaksia ZHURMA