AMP shton dy ekspertë poligrafi të certifikuar në SHBA
Ekspertët përfunduan një kurs intensiv 10-javor në Florida, duke zhvilluar mbi 400 orë trajnim në testime shkencore dhe etikë profesionale.
TIRANË — Agjencia e Mbikëqyrjes Policore ka diplomuar dy ekzaminues të rinj të poligrafit me mbështetjen e Shteteve të Bashkuara. Ambasada amerikane në Tiranë njoftoi se diplomimi u realizua falë mbështetjes nga Programi ICITAP i Departamentit të Drejtësisë dhe Byroja INL e Departamentit të Shtetit. Kështu, 2 specialistë të AMP-së certifikohen në SHBA për poligrafin për të mbështetur verifikimin e integritetit të zyrtarëve ligjzbatues.
Të dy ekspertët përfunduan një kurs intensiv dhjetëjavor në Akademinë Ndërkombëtare të Poligrafit në Fort Lauderdale të Floridës. Gjatë këtij programi, ata zhvilluan mbi 400 orë trajnim në testime shkencore, vlerësimin e besueshmërisë, metodologjinë e intervistimit dhe etikën profesionale, duke fituar aftësinë për të kryer ekzaminime në shqip dhe anglisht.
Ambasada e SHBA-së vlerësoi se aftësitë e reja do të mbështesin përzgjedhjen e kandidatëve për strukturat e zbatimit të ligjit. Ky certifikim do të forcojë kapacitetet institucionale, duke e bërë vendin një partner më të besueshëm në luftën globale kundër krimit ndërkombëtar.
Burim: ATSH
— Redaksia ZHURMA