Pse Buxhovi thotë se militantët po zëvendësojnë pelegrinët në Vidovdan?

PRISHTINË — Historiani Jusuf Buxhovi ka thënë se të gjitha veprimet që i bëjnë serbët çdo vit në festimet e Vidovdanit në Kosovë janë të orkestruara drejtpërdrejt nga Serbia, gjegjësisht nga Kisha Ortodokse dhe Akademia e Shkencave.

Buxhovi në emisionin “Konfront” në KTV, theksoi se krahasuar me vitet e kaluara, nuk ka shumë pelegrinë që vijnë në këto festime pasi sipas tij tash vijnë kryesisht militantë të porositur e paguar.

Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme.

Shënimi i sivjetmë i Vidovdanit u përcoll me disa të arrestuar nën dyshimin se kanë provokuar duke kënduar këngë nacionaliste kundër shtetit të Kosovës.

Këndimin e këtyre këngëve, Buxhovi e quajti bazë për ndërhyrje nga Policia e Kosovës. “Krahasuar me vitet e kaluara, tash kemi shumë pak pelegrinë që vijnë në Kosovë sepse tash vijnë militantë, janë të porositur e paguar, nuk kanë lidhje me atë që bëjnë.

Kishte bazë të zhvillohet ndërhyrje nga Policia e Kosovës kur këndohet në kor ‘edhe 1000 vjet do të vijmë derisa Kosova të jetë e jona’, kjo është nxitje e urrejtjes.

Pati një rast kur një nënë e kishte sjellë një fëmijë 2-3 vjeç në festime dhe në ato temperatura, pra duanin të dërgonin mesazh sepse në përgjithësi janë të porositur, të organizuar”, ka deklaruar Buxhovi.

Tubimi i serbëve në Gazimestan për festimet e Vidovdanit, të dielën është përmbyllur me disa të arrestuar. Arrestimin e tyre, Lista Serbe e cilësoi si përpjekje për frikësim.

Ndërsa peshkopi i Kishës Ortodokse Serbe, Ilarion, u ka bërë thirrje serbëve që të mos heqin dorë nga Kosova, përndryshe sipas tij, do të jenë të mallkuar në shekujt e ardhshëm

Burim: Koha.net, https://www.koha.net/arberi/buxhovi-per-vidovdanin-pak-pelegrine-e-me-shume-militante-te-porositur
— Redaksia ZHURMA