Bozhegu: BE-ja nuk pranon anëtarësimin përmes shkatërrimit të natyrës

Enida Bozhegu ka ngritur shqetësimin për mënyrën e trajtimit të pasurive natyrore dhe zonave të mbrojtura në vend, duke vënë në dukje ndikimin e interesave personale në vendimmarrje. E ftuar në emisionin «Black Box» në Ora News, ajo deklaroi se Bashkimi Europian nuk mund të pranojë anëtarësimin e një vendi që shkatërron natyrën dhe shkel rregullat, ndërsa theksoi se vlerësimi nuk bazohet te deklaratat politike, por te standardet teknike dhe rezultatet konkrete.

Duke përmendur zhvillimet e fundit dhe çështjen e flamingove, Bozhegu pretendon se pasuritë e vendit po ndahen mes aktorëve të ndryshëm sipas dëshirave dhe ambicieve personale. Ajo e krahasoi këtë situatë me një formë të kolonizimit modern, ku territori përvetësohet gradualisht përmes marrëveshjeve me investitorë të huaj. «Është një formë moderne e kolonizimit. Kështu vjen dalëngadalë kolonizimi i një vendi, deri në copëtimin e tij dhe secili merr thelat e veta», u shpreh ajo.