Bora mposht Vëllaznimin në Gjakovë dhe vazhdon ndjekjen e kreut

Skuadra prishtinase ka shënuar fitore në udhëtim ndaj Vëllaznimit me rezultat 79:72 në kuadër të xhiros së tetë. Ndeshja e zhvilluar në Gjakovë ishte mjaft e luftuar, ku vendasit fituan çerekun e parë me shifrat 20:18. Ekipi mysafir reagoi në periudhën e dytë për të marrë epërsinë para pushimit, kurse çereku i tretë u mbyll 18:16 në favor të Borës.

Vendimi përfundimtar ra në dy minutat e fundit të takimit, ndërsa në rrjedhën e ndeshjes ndikoi edhe dalja nga loja e disa lojtarëve të pesëshes startuese të Vëllaznimit pas pesë gabimeve personale. Te Bora më efikasi u tregua Rezart Mehmedi me 20 pikë, i ndjekur de Laolu Oke me 16 dhe Amin Hot me 11 pikë, kurse te Vëllaznimi u dalluan Kentrell Pullian me 24 pikë dhe Ricky Tarrant me 19.

Pas tetë xhirove, Bora mban pozitën e dytë me gjashtë fitore e dy humbje, kurse Vëllaznimi regjistron një fitore e shtatë humbje. Në xhiron e ardhshme, Bora do të presë Yllin, ndërsa Vëllaznimi do të luajë në udhëtim kundër Prishtinës.