Bild zbulon kërkesat e Putinit për paqe
Gazeta gjermane zbardh kushtet e Rusisë për Ukrainën, Evropën dhe Moldavinë, ndërsa Kremlini mohon vetëm pjesën për Finlandën.
Redaksia ZHURMA · · Përditësuar · 1 min lexim
Sipas së përditshmes gjermane «Bild», përfaqësuesit rusë kanë paraqitur gjatë bisedimeve joformale një propozim për t'i dhënë fund luftës në Ukrainë, i cili prek gjithë arkitekturën e sigurisë në Evropë. Moska kërkon kontrollin e plotë të Donbasit, përfshirë territoret që mbahen nga forcat ukrainase, status neutral për Ukrainën dhe heqjen dorë nga anëtarësimi në NATO, ndërsa rruga drejt Bashkimit Evropian mbetet e hapur. Plani përfshin gjithashtu largimin e bazave të NATO-s nga Estonia, Letonia, Lituania dhe tërheqjen e Finlandës nga Aleanca Atlantike, si dhe çmilitarizimin e porteve ukrainase të Odesës dhe Mykolaivit.
Propozimi shtrihet edhe te Moldavia, ku kërkohet krijimi i një republike federale që përfshin rajonin autonom të Gagauzisë dhe Transnistrinë, të cilat do të mund të mbanin referendume për pavarësi në rast të anëtarësimit të Moldavisë në Bashkimin Evropian. Pas publikimit të këtyre kushteve, zëdhënësi presidencial Dmitry Peskov tha se «Nuk jam në dijeni të kësaj. Jo, nuk është bërë asnjë propozim që Finlanda ose ndonjë vend tjetër të braktisë NATO-n», duke mohuar vetëm këtë pikë dhe pa hedhur poshtë pikat e tjera të raportuara.
