Besnik Jashanica rrëfen përkushtimin ndaj nxënësve dhe sportistëve në Kosovë

Mësimdhënësi dhe trajneri Besnik Jashanica rrëfen rrugëtimin e tij profesional nga puna e përditshme me fëmijët në shkollën “Mihal Grameno” në Fushë-Kosovë e deri te pjesëmarrja në garat ndërkombëtare me sportistët me aftësi të kufizuara intelektuale, duke theksuar se fitoret më domethënëse lidhen me rritjen e vetëbesimit te të rinjtë.

Dashuria për aktivitetin fizik e ka shoqëruar Jashanicën që nga fëmijëria, ndërsa dëshira për të ndihmuar të rinjtë të zhvillohen e shtyu drejt këtij profesioni. Zgjedhja e tij ndërthur edukimin me sportin, duke e kthyer pasionin e hershëm në punë të përditshme. Ai është pjesë e kolektivit të shkollës “Mihal Grameno” në Fushë-Kosovë prej vitit 2009, ku ka përcjellë njohuri dhe ka ndjekur rritjen e brezave të nxënësve për vite me rradhë.

Krahas punës në arsim, Jashanica është angazhuar aktivisht në disiplina si atletika, futbolli dhe triathloni. Federata e Triathlonit e Kosovës e ka vlerësuar atë duke e zgjedhur trajner të vitit në vitin 2023 dhe përsëri në vitin 2024. Ndërkohë, një kapitull të veçantë në veprimtarinë e tij zë angazhimi në garat ndërkombëtare të Olimpiadës Speciale të Kosovës, ku stërvit personat me aftësi të kufizuara intelektuale.

Përparimi i sportistëve mbetet synimi kryesor i punës së tij stërvitore. Jashanica vëren se secili fëmijë ka tiparet, aftësitë dhe ritmin e vet individual, prandaj ai angazhohet për t'i motivuar pa i krahasuar me të tjerët dhe për t'ua njohur përpjekjet edhe kur rezultati i garave nuk është ai që pritej. Sipas tij, raportet me nxënësit dhe sportistët ndërtohen mbi bazën e durimit, vëmendjes dhe respektit të ndërsjellë, çka u mundëson atyre të ndihen të pranuar dhe të krijojnë shoqëri me bashkëmoshatarët.

Lidhja e krijuar me nxënësit vazhdon edhe pas përfundimit të vitit shkollor apo ndarjes së rrugëve profesionale. Takimet e mëvonshme me ish-nxënësit, të cilët e kujtojnë atë me respekt dhe dashuri, përbëjnë një nga shpërblimet më të bukura moralisht për mësimdhënësin nga Fushë-Kosova. Përvoja me Olimpiadën Speciale i ka shërbyer trajnerit edhe si një mësim personal, pasi komunikimi me këto kategori i ka sjellë lidhje njerëzore të veçanta përveç anës profesionale.

Trajneri Jashanica deklaroi se është krenar për çdo sukses, por më shumë se gjithçka e gëzon zhvillimi i sportistëve dhe fakti që kanë fituar besim në aftësitë e tyre. Ai sqaroi se fillimisht u bashkua me Olimpiadën Speciale për t'i stërvitur sportistët, por më pas kuptoi se edhe vetë kishte shumë për të mësuar prej tyre. Trajneri shtoi se një nga përjetimet më të dashura është të shohë ndryshimin te një sportist që fillimisht ngurron të marrë pjesë, por me kalimin e kohës fiton guximin për të dalë në garë.