Berisha u bën thirrje qytetarëve dhe demokratëve të bashkohen me studentët

Kryetari i Partisë Demokratike, Sali Berisha, u ka bërë thirrje demokratëve dhe qytetarëve që t'i bashkohen protestës së studentëve, duke i cilësuar këto momente si historike. Në një deklaratë për mediet, Berisha tha se dhunës së qeverisë studentët e universitetit të Tiranës iu përgjigjën me grevë të përgjithshme, ndërsa lëvizjes i janë bashkuar edhe universitete të tjera në Elbasan, Vlorë, Shkodër, Durrës dhe Korçë.

Berisha përmendi gjithashtu reagimin e gjimnazistëve të shkollës “Partizani” dhe nxënësve të tjerë që kanë braktisur mësimin për t'iu bashkuar protestës, ndërsa theksoi se disa demonstrues ndodhen në spitale dhe kanë nevojë për ndërhyrje kirurgjikale. Ai deklaroi se dhjetëra mijëra studentë dhe qytetarë kanë mbushur Rrugën e Durrësit dhe po qëndrojnë me vendosmëri, duke shtuar se Partia Demokratike do të vijojë të mbështesë protestën me të gjitha kapacitetet e saj.

Nga ana e tyre, studentët që po protestojnë në Tiranë u kanë bërë thirrje qytetarëve dhe kalimtarëve që t'u bashkohen në tubim gjatë marshimit të tyre në drejtim të Rrugës së Durrësit, me thirrjen: «Çohuni nga kafja!».