Berisha: Mbi 50 të plagosur në protestë, studentët u përballën me dhunë

Kryetari i Partisë Demokratike, Sali Berisha, gjatë një takimi me drejtuesit e degëve të Partisë Demokratike në Tiranë, e cilësoi protestën e studentëve si revoltën më të fuqishme të këtij lloji. Ai pretendoi se mbi 50 studentë dhe qytetarë kanë mbetur të plagosur gjatë përplasjeve, duke përmendur raste me thyerje gjymtyrësh, fraktura të femurit, dëmtime në këmbë dhe çarje në kokë, si dhe persona të prekur nga spraji i ariut ose të goditur me topa uji.

Berisha akuzoi qeverinë dhe Policinë e Shtetit për përdorim të dhunës së ashpër ndaj protestuesve paqësorë. Sipas tij, reagimi i studentëve u nxit nga pakënaqësitë ndaj qeverisë dhe vështirësitë ekonomike, duke u ndalur te kostot e larta të strehimit dhe duke pretenduar se ndërtesat që u shërbenin studentëve janë marrë për përfitime personale e interesa private.