Berat Buzhala denoncon në polici personin që po i rrezikon sigurinë
Gazetari pretendon se i akuzuari me emrin Taulant jeton në Amerikë dhe ka lidhje të ngushta me krerët e LVV-së dhe pjesëtarë të shërbimit të inteligjencës.
PRISHTINË — Gazetari Berat Buzhala ka denoncuar në Prokurori dhe Polici një person të cilin e identifikoi si Taulant, me pretendimin se shpifjet e tij ia kanë rrezikuar sigurinë personale. Buzhala ka bërë të ditur të premten se ka marrë kërcënime të vazhdueshme për shkak të rrenave monstruoze të këtij personi.
Sipas gazetarit, personi i denoncuar jeton në Amerikë por vjen shpesh në Kosovë. Ai dyshohet se ka raporte të ngushta me krerët e Lëvizjes Vetëvendosje dhe me pjesëtarë të Agjencisë Kosovare të Inteligjencës, për të cilët Buzhala pretendon se janë punësuar nga Dejona.
Në mesin e publikimeve linçuese, gazetari përmendi shpërndarjen e fotografive të policisë serbe, ku pretendohej se njëri nga personat ishte babai i tij. Kjo fushatë ka bërë që gazetari të ndihet vazhdimisht i pasigurt, duke kërkuar reagimin e menjëhershëm të organeve të drejtësisë.
Më herët, Buzhala dhe media Nacionale ishin në shënjestër të një fushate linçimi të iniciuar nga RTK, ku dyshohej se ishte përfshirë edhe AKI-ja. Kjo qasje kishte nxitur kritika të rrepta nga organizatat ndërkombëtare për shtypin e lirë për shkak të shkeljes së lirisë së shprehjes.
Sulmet dhe shpifjet ndaj gazetarëve dhe kritikëve në rrjetet sociale janë shtuar së fundmi në Kosovë. Për raste të tilla, gjykatat tashmë kanë dënuar dhe gjobitur disa individë, në mesin e të cilëve ka pasur edhe zyrtarë të vetë Lëvizjes Vetëvendosje.
Burim: Gazeta Metro
— Redaksia ZHURMA