Beogradi zyrtar e quan 'patriot' organizatorin e sulmit të Banjskës
Pse mbrohet hapur nga Qeveria e Serbisë një figurë që ka pranuar përgjegjësinë për sulmin terrorist ndaj forcave të Kosovës?
PRISHTINË — Petar Petkoviq, drejtor i të ashtuquajturës Zyrë për Kosovën në Qeverinë e Serbisë, përmes një deklarate në platformën 'X' ka mbrojtur publikisht Milan Radoiçiqin, të cilin autoritetet e Kosovës e kanë identifikuar si organizatorin kryesor të sulmit terrorist të 24 shtatorit 2023 në Banjskë.
Petkoviq, në reagimin e tij ndaj kritikave të opozitës serbe, e quajti "të ulët dhe të turpshme" akuzën se Radoiçiq është përgjegjës për terrorin ndaj serbëve, duke e hedhur fajin tërësisht te kryeministri në detyrë Albin Kurti.
Petkoviqi sulmoi gjithashtu politikanin opozitar serb Miroslav Aleksiq për shkak të kritikave ndaj Radoiçiqit, duke deklaruar se "një patriot serb nuk e dëbon popullin e vet, por lufton për të me zemër e me shpirt".
Radoiçiq vetë ka pranuar përgjegjësinë për organizimin e sulmit, duke thënë se ai personalisht ka bërë të gjitha përgatitjet logjistike. Pavarësisht kësaj, ai vazhdon të jetë i lirë në Serbi, pa u ndjekur penalisht nga autoritetet serbe.
Për sulmin terrorist në Banjskë, bashkësia ndërkombëtare, përfshirë NATO-n, ka kërkuar në vazhdimësi përgjegjësi nga Serbia duke kërkuar që Milan Radoiçiq të sillet para drejtësisë. Kjo deklaratë e Petkoviqit vjen si një mbështetje e qartë politike nga Beogradi zyrtar për një figurë të lidhur drejtpërdrejt me sulmin e armatosur kundër forcave të rendit të Kosovës.
Burim: Zëri, http://www.zeri.info/aktuale/627519/beogradi-zyrtar-mbron-hapur-radoiciqin-petkoviqi-e-quan-patriot-organizatorin-e-sulmit-terrorist-ne-banjske/
— Redaksia ZHURMA
