Çfarë tregoi bilanci i Autoritetit të Konkurrencës për 2025-in?
18 monitorime, 7 hetime dhe rreth 100 vendime — sa ka ndikuar institucioni në çmimet e tregut?
TIRANË — Komisioni për Nismat Qytetare, Bashkëpunimin dhe Mbikëqyrjen Institucionale shqyrtoi projektrezolutën për vlerësimin e veprimtarisë vjetore të Autoritetit të Konkurrencës për vitin 2025 dhe rekomandimet për 2026-n.
Kryetari Denar Biba theksoi rolin e institucionit në garantimin e konkurrencës së ndershme. Relatorja Ilva Gjuzi vlerësoi AK-në si institucion kyç për mbrojtjen e fuqisë blerëse, duke theksuar se ndikimi i konkurrencës reflektohet drejtpërdrejt në çmimet e produkteve bazë, shërbimet telefonike dhe ato bankare.
"Gjatë vitit 2025 Autoriteti i Konkurrencës ka kryer 18 monitorime në tregje, 7 procedura hetimore dhe ka shqyrtuar 83 ankesa", tha Gjuzi. Biba bëri të ditur se institucioni ka marrë rreth 100 vendime gjatë vitit. Ndërhyrjet kanë ndikuar në frenimin e rritjes së çmimeve për produktet e shportës në periudha festive, veçanërisht në festat e fundvitit.
Hetime janë kryer në tregje të ndryshme: sigurimet e detyrueshme, telekomunikacionin, tregun bankar dhe atë të fruta-perimeve. "Mbi 70% e vendimeve të Autoritetit të Konkurrencës janë lënë në fuqi nga gjykatat", deklaroi Biba. Gjuzi kërkoi indikatorë më të qartë performancë për të matur efektin real të ndërhyrjeve.
Për 2026-n, ajo rekomandoi raportim çdo katër muaj në Kuvend dhe forcim të bashkëpunimit institucional për zbatimin efektiv të vendimeve, në funksion të standardeve të Bashkimit Europian.
Burim: ATSH
— Redaksia ZHURMA
