Autoritetet serbe ndalojnë delegacionin e Kosovës në kufi gjatë udhëtimit drejt Preshevës

Autoritetet serbe ua kanë ndaluar hyrjen në Preshevë anëtarëve të delegacionit nga Kosovë, i cili po udhëtonte për të shprehur ngushëllimet për kryetaren e Komunës së Preshevës, Ardita Sinani, pas vdekjes së babait të saj. Delegacioni përbëhej nga shefja e Grupit Parlamentar të Lëvizjes Vetëvendosje, Arbërie Nagavci, deputetet Fatmire Kollçaku dhe Liza Gashi, si dhe këshilltari politik i kryeministrit, Ragmi Mustafi.

Sipas deklaratës, policia serbe i ka ndalur në pikën kufitare dhe i ka mbajtur për më shumë se dy orë pa dhënë ndonjë arsye, për t'i njoftuar më vonë se nuk mund të vazhdonin udhëtimin dhe se duhej të ktheheshin prapa. Vizita u cilësua si private dhe me karakter humanitar, pa asnjë axhendë politike. Për shkak të ndalimit, ngushëllimet u përccollën afër kufirit, ku kryetarja e Komunës së Preshevës kishte shkuar së bashku me familjarët për t'i takuar.

Arbërie Nagavci e ka quajtur këtë veprim të papranueshëm dhe ka shtuar se rasti do t'i referohet autoriteteve dhe institucioneve përkatëse të Bashkimit Evropian.