Auditimi në Hidrodrini shfaq mospërputhje, Rrahmani kërkon hetim nga Prokuroria

Zyra Kombëtare e Auditimit ka identifikuar dobësi në menaxhimin financiar dhe mospërputhje pasurie te Kompania Rajonale e Ujësjellësit «Hidrodrini» për vitin 2025. Raporti me 14 rekomandime u shqyrtua në Komisionin parlamentar për Mbikëqyrjen e Financave Publike, ku deputeti Eman Rrahmani kërkoi që me rastin të merret Prokuroria.

Raporti i auditimit përmban gjithsej 14 rekomandime për KRU «Hidrodrini», prej të cilave dy janë rekomandime të reja, tetë janë të përsëritura nga viti 2024 dhe katër janë pjesërisht të përsëritura. Ndërmarrja nuk kishte pasur auditim nga Zyra Kombëtare e Auditimit për më shumë se pesë vjet para se kryeshefi ekzekutiv Dri Cena të zgjidhej në detyrë në qershor të vitit 2023. Procesi i vlerësimit të pasurive ishte realizuar për herë të fundit nga vetë kompani në vitin 2005.

Gjatë prezantimit të raportit, kryetari i komisionit Besian Mustafa tha se ndërmarrja kishte paraqitur pasuri afatgjata në vlerë prej 39 milionë euro në pasqyrën e pozitës financiare, ndërsa regjistri i pasurisë shfaqte vlerën 38 milionë euro. Kjo diferencë krijoi një mospërputhje prej 1 milion e 45 mijë e 549 eurosh. Mustafa sqaroi gjithashtu se nga vlera bruto e llogarive të arkëtueshme prej 17 milionë e 188 mijë e 428 eurosh, mbi 97 për qind ishin më të vjetra se një vit pa njohje për humbjet e pritshme. Sipas Mustafës, ndërmarrja kishte miratuar një draft-rregullore për provizionim të llogarive të arkëtueshme, por ajo nuk u finalizua për shkak të mungesës së bordit të drejtorëve, ndërsa gjatë vitit 2025 nuk u kryen as harmonizime periodike me furnitorët.

Kryesuesja e Bordit të Hidrodrinit, Qëndresa Kukaj, njoftoi se tri gjetje të raportit janë trajtuar dhe gjashtë të tjera janë në proces trajtimi. Ajo sqaroi se mosparaqitja e kontratave në e-prokurim është zgjidhur dhe të gjitha kontratat menaxhohen përmes sistemit. Kukaj shtoi se me emërimin e bordit në prill është trajtuar edhe mungesa e komisionit të auditimit. Për pronat e paidentifikuara, ajo tregoi se menaxhmenti ka krijuar një listë të plotë që mbetet ende në proces, ndërsa te konsumatorët e paidentifikuar një pjesë e të hyrave rrjedhin nga institucione si shkollat dhe universitetet. Nga ana e tij, kryeshefi ekzekutiv Dri Cena tha se ndërmarrja ka shënuar përmirësime në krahasim me vitet e mëparshme, ndonëse pranoi praninë e problemeve në lidhjen e kontratave me konsumatorët.

Pas shqyrtimit të raportit të KRU «Hidrodrini», Komisioni parlamentar për Mbikëqyrjen e Financave Publike vazhdoi punën me shqyrtimin e raportit të Auditimit për Pasqyrat Financiare Vjetore të ndërmarrjes Trepça.