Asllani: Nuk mund të shkruaja një histori më të bukur

Sulmuesi i Kombëtares së Kosovës, Fisnik Asllani, shënoi golin e tij të parë të sezonit në fitoren 2-1 të Hoffenheimit kundër Schalke 04 në xhiron e nëntë të Bundesligës. 24-vjeçari realizoi në minutën e 10-të për të kaluar skuadrën e tij në epërsi, ndërsa tha se nuk mund të shkruante një histori më të bukur.

Siç raportoi Zhurma më 8 nëntor 2026, sulmuesi i Kosovës shënoi golin e parë sezonal në eliten gjermane pikërisht në përballjen ndaj Schalke 04.

Goli i 24-vjeçarit erdhi pasi ai ushtroi presion ndaj portierit kundërshtar, Loris Karius. Pas ndërhyrjes me këmbë të Asllanit, topi u përplas mbi portierin dhe përfundoi brenda rrjetës. Pas këtij suksesi, Hoffenheimi ngjitet në kuotën e 12 pikëve në vendin e nëntë të renditjes tabelare, ndërsa Schalke mbetet e 17-ta me gjashtë pikë. Sezonin e kaluar me klubin e tij, sulmuesi kosovar kishte realizuar dhjetë gola dhe dhuruar shtatë asistime në kampionat, gjersa gjatë këtij edicioni ka shënuar edhe një gol në Ligën e Evropës. Fitorja 2-1 u arrit pas një periudhe shumë të ngarkuar me nëntë ndeshje brenda 29 ditësh. Trajneri Christian Ilzer dhe vetë lojtari e pranuan se skuadra ndjeu lodhjen prej mungesave të shumta, ku të njëjtët 12 apo 13 lojtarë po aktivizoheshin vazhdimisht në formacion.

Pas ndeshjes, sulmuesi zbuloi se këtë realizim ia kushton familjes së tij sepse dita e ndeshjes përkonte me lindjen e të atit. Asllani sqaroi se goli i tij i parë në kampionatin gjerman për këtë edicion ishte dhurata më e mirë për babanë e tij. Ai pranoi se fati luajti rolin e vet në mënyrën se si topi shkoi në rrjetë, por këmbënguli se vendimtar ishte vrapimi dhe presioni i bërë në çastin e duhur. Lidhur me ngarkesën e kalendarit me katër javë radhazi ndeshje edhe në mesjavë, lojtari shprehu preferencën për të zbritur sa më shpesh në fushat e lojës sesa për të kaluar kohë në seancat stërvitore.

“Pati pak fat që topi përfundoi në rrjetë në atë mënyrë, kjo është e vërtetë. Por nuk ishte vetëm fat, sepse unë bëra atë vrapim. Vetëm në atë mënyrë mund të shënohej goli. Nëse nuk do ta bëja atë lëvizje, goli nuk do të realizohej”, deklaroi sulmuesi kosovar. Ai shtoi me tutje: “Kur luan katër javë rresht me ndeshje edhe gjatë mesjavës, është një ngarkesë shumë e madhe. Ndoshta sot na mungoi ajo cilësi shtesë ndaj Schalkes, sidomos kur ke edhe mungesa. Kohët e fundit dukej sikur të njëjtët 12 apo 13 lojtarë ishin gjithmonë në formacionin titullar”. Lojtari po ashtu tha: “Unë jam dikush që e pëlqen këtë. Preferoj të luaj, asgjë nuk është më e mirë sesa të kesh ndeshje çdo disa ditë. Më mirë kështu sesa të stërvitem”. Sa i përket dedikimit familjar, ai u shpreh: “Golat gjithmonë më japin një ndjenjë të veçantë, është gjithmonë diçka shumë e bukur. Por sot është edhe ditëlindja e babait tim. Ky ishte praktikisht dhurata ime për të. Goli im i parë në Bundesligë këtë sezon, nuk mund të shkruaja një histori më të bukur se kjo”.