Arrestohet në Zvicër 35-vjeçari shqiptar pas vjedhjes me thyerje

Një shtetas 35-vjeçar shqiptar është arrestuar në Hünenberg të kantonit Zug në Zvicër, pasi dyshohet se kishte hyrë me forcë në një apartament në zonën Schlattwäldli. Ngjarja ka ndodhur të enjten në mbrëmje, pak para orës 19:00, kur autoritetet policore morën njoftimin për një person të dyshuar për vjedhje brenda banesës. Edhe pse patrullat e policisë shkuan menjëherë në vendngjarje, i dyshuari ishte larguar nga aty para mbërritjes së tyre.

Për kapjen e tij, policia ka aktivizuar një dron, i cili e ka vërejtur personin e dyshimtë në një fushë në lindje të pronës. I dyshuari është fshehur në një zonë industriale pasi ka vënë re mjetin fluturues, por është lokalizuar përmes fotografive ajrore dhe pamjeve të vazhdueshme, duke bërë të mundur arrestimin e tij dhe dërgimin në paraburgim.

Zyra e Prokurorit të Kantonit të Zugut ka hapur një hetim penal ndaj të dyshuarit dhe pritet të kërkojë caktimin e masës së paraburgimit, ndërkohë që hetimet rreth këtij rasti vijojnë.