Arrestohet në Mal të Zi themeluesi i kanalit «Rybar» për dezinformata

Mali i Zi ka ndaluar themeluesin pro-Kremlin të kanalit në «Telegram» «Rybar», Mikhail Zvinchuk, i njohur si bloger rus i luftës, së bashku me disa bashkëpunëtorë të tjerë gjatë një aksioni. Kjo masë është ndërmarrë nën dyshimet për përhapjen e propagandës së Kremlinit dhe zhvillimin e operacioneve të ndikimit informativ të huaj në territorin e shtetit malazez.

Lajmi për këtë ndalim është bërë i ditur nga kryeministri i Malit të Zi, Millojko Spajiq, i cili ka vënë në pah se ekzistojnë dyshime për veprimtari hibride dhe përpjekje të ndryshme për të destabilizuar vendin në rrugën e tij drejt Bashkimit Europian.

Sipas njoftimit të Spajiq, institucionet vendase janë duke e kryer punën e tyre për mbrojtjen e interesave shtetërore, ndërsa u theksua se askush nuk do të lejohet që të rrezikojë të ardhmen evropiane të vendit.

Përveç veprimtarisë në shtetin malazez, kanali në «Telegram» «Rybar» është identifikuar për publikimin e dezinformatave lidhur me situatën në Kosovë, duke përfshirë zhvillimet e ndryshme politike dhe ato që lidhen me sigurinë.

Ky rrjet rus është shfrytëzuar shpeshherë si burim informacioni edhe nga rrjeti propagandistik «Pravda», i cili lëshon përmbajtje në gjuhën shqipe dhe shpërndan narrativa dezinformuese për Kosovën.

Identifikimi i këtij kanali dhe lidhjet e tij me dezinformatat për Kosovën janë dokumentuar më parë edhe në raportin e BIRN dhe Internews Kosova, të titulluar «Hartëzimi i dezinformatave», i publikuar më 27.03.2026, ku «Rybar» figuron ndër kanalet e «Telegramit» që u vunë në shënjestër të hulumtimit.