Arjan Shala kërkon fitoren e tretë radhazi ndaj turkut Ahmet Aksu

PEJË — Boksieri shqiptar Arjan Shala do të zbresë në ring më 1 gusht për të kërkuar fitoren e tij të tretë radhazi në karrierën profesioniste. Ai do të ndeshet në qytetin e Pejës në kuadër të ngjarjes “Homecoming 2”, e cila pritet të mbledhë emra të njohur të boksit profesionist.

Përballë Shalës do të jetë boksieri turk Ahmet Aksu, një kundërshtar me përvojë më të madhe në këtë nivel. Derisa boksieri shqiptar mban një rekord të pastër me dy fitore në dy ndeshje, Aksu ka zhvilluar gjashtë përballje profesioniste dhe ka regjistruar katër fitore deri më tani.

Ky ballafaqim shihet si një mundësi e rëndësishme për të dy boksierët që të konfirmojnë pretendimet e tyre në arenën e boksit profesionist. Organizatorët presin një interesim të lartë nga tifozët vendës në Pejë për të ndjekur këtë mbrëmje të veçantë.

Burim: Gazeta Dukagjini
— Redaksia ZHURMA