AUV konfirmon se qumështi Vita s'ka pluhur e as vaj palme
Këshilltari ligjor i kompanisë ABRAZEN, Lekë Sahatqiju, deklaroi se raportet e laboratorit të agjencisë vërtetojnë se dyshimet ishin të pabaza.
PRISHTINË — Agjencia e Ushqimit dhe Veterinarisë ka konfirmuar se produktet e qumështores Vita nuk përmbajnë qumësht pluhur apo yndyrë bymore të shtuar. Raportet e analizave zyrtare i janë dorëzuar kompanisë ABRAZEN L.L.C. në Sinajë të Istogut, pas ekzaminimit të mostrave të qumështit dhe jogurtit.
Këshilltari ligjor i kompanisë, Lekë Sahatqiju, deklaroi në emisionin EURO T7 se në mostrat e testuara nuk është detektuar asnjëra nga këto substanca. Sahatqiju theksoi se rezultatet laboratorike vërtetojnë se qumështi nuk përmban pluhur, duke rrëzuar kështu dyshimet e ngritura së fundmi.
Sipas raporteve të AUV-it, analizat e kryera në dy pako të qumështit UHT dhe jogurtit vërtetuan se nuk ka as yndyrë bymore, përkatësisht vaj palme. Sahatqiju deklaroi se analizat laboratorike po vërtetojnë se pretendimet e ngritura ishin vetëm një tentativë për të hedhur pluhur syve.
Burim: Gazeta Express
— Redaksia ZHURMA