Adnan Xholi hyn i pari në garën për Prokuror të Përgjithshëm

TIRANË — Prokurori i SPAK-ut, Adnan Xholi, ka dorëzuar zyrtarisht platformën e tij si kandidat për postin e Prokurorit të Përgjithshëm të Shqipërisë, duke u bërë i pari që hyn në këtë garë. Ky hap shënon nisjen zyrtare të procesit për zëvendësimin e kryeprokurorit aktual, Olsian Çela.

Gara është hapur nga Këshilli i Lartë i Prokurorisë, i cili shërben si institucioni i qeverisjes së prokurorëve. Sipas gazetarit të Euronews Albania, Eni Ferhati, afati ligjor për dorëzimin e dokumenteve dhe platformave të kandidatëve do të jetë i hapur deri më 1 gusht në mesnatë.

Deri në përfundim të këtij afati pritet që numri i kandidatëve të arrijë në katër apo pesë emra. Ferhati bëri të ditur gjatë emisionit se mes tyre pritet të ketë edhe kandidatura nga radhët e grave, duke shtuar dinamikë në procesin përzgjedhës.

Adnan Xholi ka një karrierë të gjatë në sistemin e drejtësisë, ku ka mbajtur më parë poste drejtuese në Prokurorinë e Përgjithshme. Kulmi i karrierës së tij mbetet anëtarësimi në Prokurorinë e Posaçme në vitin 2019, si pjesë e grupit të dytë të prokurorëve.

Gjatë punës në SPAK, Xholi ka drejtuar seksionin kundër krimit të organizuar për tre vite së bashku me Altin Dumanin. Ai njihet për hetimin e dosjeve të rëndësishme si ato të përgjimeve Sky ECC dhe është përballur me kërcënime të drejtpërdrejta nga krimi i organizuar.

Përzgjedhja e kryeprokurorit të ri do të bëhet me votat e 11 anëtarëve të KLP-së, ku përfshihen prokurorë, juristë, akademikë dhe përfaqësues të shoqërisë civile. Nëse Xholi zgjidhet në këtë post, KLP-ja do të duhet të hapë një garë të re për zëvendësimin e tij në SPAK.

Ndonëse reforma në drejtësi e ka decentralizuar sistemin, duke bërë që posti i prokurorit të përgjithshëm të sfumohet disi dhe të marrë rolin e një menaxheri, gara mbetet e rëndësishme. Kjo përzgjedhje do të përcaktojë drejtuesin e ri administrativ të organit të akuzës.

Burim: Euronews Albania
— Redaksia ZHURMA