Me çfarë projektesh premton Abdixhiku të maten ministrat e LDK-së në Gjilan?
Kreu i LDK-së ironizoi projektin e Muajt në Podujevë dhe premtoi përfundimin e Autostradës së Gjilanit.
GJILAN — Kryetari i LDK-së dhe kandidat për kryeministër, Lumir Abdixhiku, ka vazhduar fushatën zgjedhore në Gjilan, ku tha se pati "pritje të jashtëzakonshme" në qytetin e Anamoravës. "Një energji që të jep besim se fryma e ndryshimit po rritet çdo ditë e më shumë", deklaroi ai.
Abdixhiku ironizoi me "projektin" e përuruar të njëjten ditë në Podujevë nga ministri në detyrë i Bujqësisë, Armend Muja. "Në Gjilan folëm qartë; ministrat e LDK-së nuk do të mburren me hapje dërrasash të vadave, ministrat tanë do të maten me punë të mëdha. Me përfundimin e Autostradës së Gjilanit. Menjëherë", tha ai.
Ai shtoi se "Kosova nuk ka më kohë për propagandë e fotografi ceremoniale", duke përmendur kandidatët për deputetë nga Gjilani: Lutfi Haziri (numër 5), Valentina Bunjaku Rexhepi (21), Gentrit Murseli (68), Besim Guda (69) dhe Drenushë Maloku Bejtullahu (103).
Burim: Zëri
— Redaksia ZHURMA