Çfarë bëri 15-vjeçari i Dragashit me 153 eurot e gjetura?
Djali gjeti kuletën me 153 euro dhe dokumente personale më 18 qershor në rrugën Dragash-Brod dhe e dorëzoi menjëherë në stacionin policor.
DRAGASH — Më 18 qershor, teksa po lëvizte me biçikletë në rrugën Dragash-Brod, afër fshatit Kukajan, një 15-vjeçar hasi në një kuletë të humbur. Brenda saj ndodheshin dokumente personale dhe 153 euro para të gatshme. I mituri nuk hezitoi: u nis drejt Stacionit Policor në Dragash dhe e dorëzoi menjëherë kuletën.
Duke u shërbyer me dokumentet e gjetura brenda kuletës, policia arriti ta identifikojë pronarin dhe e kontaktoi atë. Një ditë më vonë, pronari u paraqit vetë në stacion, mori sendet e tija dhe shprehu mirënjohje për veprimin e ndershëm të 15-vjeçarit.
Pronari falënderoi si 15-vjeçarin për ndershmërinë, ashtu edhe zyrtarët policorë për angazhimin e tyre, sipas njoftimit të policisë.
Burim: Klan Kosova
— Redaksia ZHURMA