Botërori 2026 arrin 100 gola në vetëm 33 ndeshje

NEW YORK — Në Botërorin e futbollit që po organizohet në Shtetet e Bashkuara, Kanada dhe Meksikë, është shënuar realizimi më i shpejtë i 100 golave të parë që nga viti 1958. Goli jubilar i 100-të erdhi pikërisht në ndeshjen e 33-të të këtij turneu, duke konfirmuar një efikasitet të jashtëzakonshëm të skuadrave pjesëmarrëse.

Ky gol historik u realizua nga sulmuesi holandez Cody Gakpo, i cili shënoi golin e katërt për Holandën në fitoren e tyre të thellë 5:1 kundër Suedisë. Ky edicion shënon një kthesë pas plot 68 vjetësh, pasi për herë të fundit që u deshën 33 ndeshje ishte viti 1958.

Krahasimi me edicionet e kaluara nxjerr në pah dinamikën e lartë të këtij viti. Në vitin 2014 në Brazil dhe në vitin 1982 në Spanjë, u deshën nga 36 ndeshje për të arritur te 100 golat. Ndërsa në Argjentinë më 1978 dhe në Shtetet e Bashkuara më 1994, u kërkuan plot 38 ndeshje për të kapur këtë kuotë të golave.

BBC shkruan se një nga arsyet kryesore të këtij efikasiteti, ku mesatarja aktualisht qëndron mbi tre gola për ndeshje, mund të jetë topi Adidas, i quajtur "Trionda". Trajektorja e tij në fluturim duket se po i kap në befasi portierët e shumë përfaqësueseve.

Ish-portieri Joe Hart vuri re se ky top po lëviz shumë më shpejt se që pritej kur kroati Martin Baturina barazoi rezultatin ndaj Jordan Pickford. Paul Robinson deklaroi për BBC se topi në disa raste nuk sillet siç pritet normalisht nga lojtarët.

Kjo situatë ngjason me topin famëkeq "Jabulani" në vitin 2010, i cili u kritikua ashpër nga portierët për devijimet e paparashikueshme. Përveç topit, në këtë rritje ka ndikuar shpërthimi i yjeve si Lionel Messi, Kylian Mbappe, Vinicius Junior, Erling Haaland dhe Harry Kane.

Sipas Micah Richards, sulmuesit po shfaqen jashtëzakonisht të sigurt para portës në këtë kampionat, duke rritur spektaklin e çdo ndeshjeje. Me këtë ritëm të lartë, pritet që ky edicion ta kalojë lehtësisht shifrën e përgjithshme prej 300 golave në fund.

Burim: Koha.net
— Redaksia ZHURMA