Çfarë shkelje zbuloi ZKA-ja në prokurimet e KEK-ut?

PRISHTINË — Korporata Energjetike e Kosovës ka lidhur gjashtë kontrata përmes procedurës së negociuar në vlerë prej mbi 1.6 milionë euro, pasi tenderët e rregullt për acid klorhidrik dhe mazut dështuan për shkak të kritereve diskriminuese. Raporti i fundit i Zyrës Kombëtare të Auditimit (ZKA) e ka vënë në pah këtë dështim si pasojë të mangësive në dosjet e tenderit.

Tri kontrata për furnizim me acid klorhidrik në vlerë 240,030 euro dhe tri për mazut mbi 1.4 milionë euro i lidhi KEK-u vitin e kaluar, ani se kishte shpallur tender të rregullt. Sipas ZKA-së, kriteri diskriminues lidhej me standardin EN 939:2016, i cili aplikohet për acid klorhidrik për ujëra të pijshëm, jo për trajtim industrial.

KEK-u është arsyetuar se aktivitetet e filluara në 2024 dhe 2025 janë anuluar dhe për këtë kanë lidhur kontrata me negocim. "Gjatë vitit 2026 kemi filluar procedurat e reja për të dy lëndët, Kontrata Kornizë 3-vjeçare", thuhet në arsyetimin e ndërmarrjes, duke shtuar se mungesa e këtyre lëndëve do të shkaktonte krizë energjetike.

ZKA-ja ka konstatuar edhe se në 12 raste të furnizimit me gazra industrialë, menaxheri i kontratës nuk ka aprovuar përputhshmërinë e furnizimeve me kushtet e kontratës. Në dosje mungojnë dëshmitë e konfirmimit se malli është furnizuar nga prodhuesi i certifikuar sipas standardeve ISO.

Shkelje tjetër është përdorimi i shpeshtë i procedurës me vlerë minimale. Sipas neneve 16, 17 dhe 18 të Ligjit të Prokurimit Publik, autoritetet kontraktuese ndalohen të ulin artificialisht vlerën e kontratës ose të ndajnë kërkesat për të anashkaluar kufijtë financiarë. KEK-u lidhi gjashtë kontrata për kushineta në vlerë 56,198 euro, tri prej tyre më të ulëta se 1,000 euro, dhe dhjetë kontrata për ngjitës në vlerë 84,972 euro, tetë me të njëjtin operator.

Kjo praktikë, sipas ZKA-së, mund të cenojë ekonomicitetin, pasi çmimet për sasi më të vogla mund të jenë më të larta. Opinion i ZKA-së për pasqyrat financiare vjetore të KEK-ut është i kualifikuar, duke pasqyruar probleme të thella në menaxhimin e prokurimeve publike.

Ndërmarrja gjatë vitit 2025 ka nënshkruar edhe 32 kontrata furnizimi me konsumatorë komercialë që nuk kanë përmbushur kërkesën për garancion bankar ose parapagim, duke rrezikuar menaxhimin e riskut kreditor.

Burim: IndeksOnline, https://indeksonline.net/auditori-ia-numeron-kek-ut-kontratat-njeburimore/
— Redaksia ZHURMA